Um helgina fórum við í fyrstu húsbílaferð ársins og gistum við á Þingvöllum. Veðrið var mjög gott, bjart og fallegt, en frekar svalt. Við lögðum af stað á föstudagskvöldi, gistum eina nótt á Þingvöllum og keyrðum svo á laugardag í Vaðnes þar sem við komum við í bústaðnum hjá Steina og Mettu. Síðan fórum við á Selfoss þar sem haldnir voru sunnlenskir sveitadagar. Að lokum keyrðum við Þrengslin heim og stoppuðum í fjörunni við Ölfusárósa.



Myndir frá helginni

Að venju var farið á Andrésarleikana í apríl, en við höfum ekki farið síðustu tvö ár vegna þess að strákarnir eru hættir að æfa og núna er Íris byrjuð að æfa skíði með skíðadeild Víkings... Nánar

Jæja, þá er kominn tími til að endurvekja þetta ferðablogg, en einhverra hluta vegna hefur það legið niðri í eitt og hálft ár. Það er ekki þar með sagt að ég hafi ekki ferðast neitt allan þann tíma, en nú stendur til að sinna þessu betur og skrifa blogg eftir hvert ferðalag.... Nánar

Núna erum við Snorri föst í Munchen í Þýskalandi og höfum verið þar síðan aðfaranótt sunnudags. Það hefur verið mikill sjór og óveður í London um helgina og miklar tafir á flugi þangað.

En ferðalagið okkar hófst uppúr miðnætti á lausgardagskvöld. Ég var búin að panta flugvalla-skutlu frá Kaprun að flugvellinum í Munchen, og til þess að vera örugg að ná fluginu á sunnudagsmorgun þá þurftum við að panta bíl sem lagði af stað frá Kaprun kl.01.40. Á meðan við vorum að rembast við að halda okkur vakandi á laugardagskvöld þá fékk ég sms frá EasyJet um að flugið hefði verið fellt niður. Ég trúði ekki mínum eigin augum og fór á netið og sá þá að það væri vitlaust veður í London og allt flug lá niðri.
Ég reyndi að finna annað flug en það var ekkert laust og við vorum búin að panta og borga fyrir skutluna og ákváðum því að fara á fluvöllinn og freista þess að panta eitthvað annað flug.

Ferðin þangað tók alla nóttina, en við þurftum fyrst að fara til Salzburgar, skipta þar um bíl og vorum svo komin til Muchen kl.6 um morgunin. Þá var allt lokað og við sáum að við vorum ekki eina fólkið sem var að missa af flugi ;-)   Við tók bið og bið og biðraðir og leit á netinu að öðru flugi... og niðurstaðan var sú að fara á hótel í boði EasyJet og við fengum bókað flug á mánudagskvöldi.

Þá vorum við búin að missa af fluginu London-Reykjavík og þurftum að panta annað flug frá London á þriðjudagsmorgni... með tilheyrandi kostnaði... en EasyJet sagði að þeim kæmi ekkert við þó við misstum af öðru flugi

Við fórum á fínt hótel í Freising sem er bær rétt hjá flugvellinum. Það fengum við fínan kvöldverð, hlaðborð með fjölbreyttum réttum og svo morgunverð daginn eftir.

Þar sem flugið okkar var ekki fyrr en kl.10 um kvöldið (mánudag) þá ákváðum við Snorri að taka lest í miðbæ Munchen, skoða bæinn og klára jólagjafainnkaupin. Veðrið var ekkert sérlega gott, slydda og svo rigning, en við höfðum gaman af borgarferðinni og gátum klárað jólagjafalistann.

Þegar við komum svo aftur uppá hótel til að sækja farangurinn þá spurði ég þá í lobbýinu hvort flugið væri ekki enn á áætlun og þeir sögðu svo vera. Við fórum því með flugvallarskutlunni út á flugvöll kl.6 og vorum tímanlega. En þegar við komum á flugvöllin kom í ljós að það var búið að hætta við flugið okkar...aftur 

Þetta var mjög skrýtið því að mörg önnur flug voru farin til London og við fengum m.a. þá skýringu að flugvöllurinn í Gatwick ætti ekki meiri afísingunarvökva og því þyrfti að hætta við nokkur flug.... aaaaarrrrgggg...  og endilega okkar flug.

Ég fór þá netið til að leita að öðru flugi, í gegnum annan flugvöll en London. Eftir mikla leit og mikil útgjöld pantaði ég flug frá Munchen til Kaupmannahafnar með SAS og þaðan með IcelandExpress til Íslands.
En það flug er ekki fyrr en á morgun og við þurftum því að fara aftur á hótel... og þá lentum við á öðru hóteli því að það var allt orðið fullt á hinu hótelinu.

Eftir að hafa beðið á flugvellinu til kl.11 um kvöldið, eftir að hótelskutla mynda sækja okkur, þá ákváðum við að taka leigubíl á hótelið, ásamt öðru fólki sem var í svipaðri stöðu og við.

Og við vorum aldeilis ekki eina fólkið sem beið eftir flugi til London... eitt flug var m.a. afturkallað á eftir okkar flugi og þar var fólk búið að tékka inn farangurinn og var á leiðinni út í vél.... þeir farþegar eru núna á leiðinni hingað á hótelið með rútu... um 100 manns.... og það þarf að bíða í tvær nætur í viðbót allavega.

Ég vona svo sannarlega að við komumst heim á morgun en annars eigum við pantað til London á miðvikudaginn 22.des.... með EasyJet... og vonumst þá til að fá eitthvað flug þaðan til Íslands.

Þetta er að verða frekar þreytandi ferðalag... og mér finnst stundum að ég sé í ákveðinni bíómynd... föst á flugvelli...

En það þýðir ekkert annað en að vera bjartsýnn og vona það besta... ég vonast allavega til að komast heim fyrir jól...  en það minnka möguleikarnir með hverjum degi því að allt flug er að verða uppselt... enda einn mesti annatími ársins um jólin.

Flugvallarkveðjur frá Þýskalandi

Núna erum við Snorri komin aftur heim til Kaprun í Austurrísku Ölpunum og ætlum að dvelja hér í 10 daga á skíðum. Við komum með flugi til London og þaðan til Munchen í Þýskalandi. Alex og Elfi, vinir okkar hér í Kaprun, voru svo elskulega að sækja okkur á flugvöllinn í Munchen á fimmtudaginn.
Það var mjög gaman að koma aftur til Kaprun og mér fannst þegar ég kom að ég hefði verið hérna í gær. En það er samt hálf skrýtið að vera hérna án hinna í fjölskyldunni. Við Snorri erum bara tvö og það er frekar tómlegt að hafa ekki Ingó, Írisi og Sigurstein líka.


Hérna er mikið vetrarríki, fysta sólarhringinn snjóaði rúmlega 30 cm og enn snjóar. Við höfum farið á skíða alla dagana nema fyrsta daginn en þá skruppum við í búð og í bæinn. Við erum ekki með bíl þannig að við förum allar okkar ferðir í strætó, bæði í búðina og á skíðasvæðin. Á þessum árstíma fer strætó með hálftíma millibili en á háannatíma (frá jólum fram í mars) þá fer hann á 15 mín fresti. Annars er stutt fyrir okkur að labba í matvörubúð og í bæinn.

Við höfum mest verið á skíðum í Schmitten sem er skíðasvæðið við Zell am See. Við fórum m.a. þangað í gær og það snjóaði mikið framan af degi og var frekar kalt. En eftir hádegi þá létti til og sólin skein. Þá litum við yfir dalinn og Kitzsteinhorn, 3000m tindurinn blasti við okkur. Við ákváðum þá að skella okkur þangað og njóta útsýnisins því við vissum ekki hvort það kæmi aftur svona bjart og fallegt veður. Við tókum skíðabusinn og vorum komin upp á Kitzsteinhorn skíðasvæðið um tvöleytið. Það var ekki margt fólk þar enda 20 stiga frost og vindur. Það var eiginlega ekki hægt að vera úti við nema í smá stund í einu. Frostið var svo mikið að það beit í allt bert hörund og nauðsynlegt að hylja allt andlitið. Það brakaði í snjónum og úlpunni, fötin voru hreinlega frosin utan á manni, og þegar ég tók af mér vettlingana til að taka mynd þá frusu puttarnir um leið.
Það var því ekki um annað að ræða en að skella sér inn í fjallaskála og fá sér kakó og Stroh til að hlýja sér

Næstu daga er spáð miklu frosti og snjókomu og þá er bara um að gera að klæða sig vel áður en haldið er út í frostið. Við ætlum líka að kíkja á jólamarkaðinn í Zell am See og njóta náttúrunnar og fegurðarinnar hérna. En þó það sé frekar svalt þá er ótrúlega fallegt og jólalegt þegar allt er á kafi í snjó, trén þakin snjó, grýlukerti alls staðar og froststilla yfir öllu.

Bestu kveðjur úr vetrarríki Alpanna í Austurríki

Þó það hafi nú lítið farið fyrir bloggfærslum í haust þá er nú ekki þar með sagt að ekkert hafi verið ferðast síðan í ágúst. Einhverra hluta vegna þá hef ég bara gleymt þessu ferðabloggi hérna, enda höfum við ekkert ferðast á húsbílnum síðan í haust.

Húsbíllin varð eftir í Danmörku í ágúst og þangað til í október en þá flaug Ingó til Danmerkur ásamt Íris Örnu, til að sækja húsbílinn. Þau flugu til Köben og þaðan með innanlandsflugi til Sönderborgar, til Þóru og Jóa. þar voru mamma og pabbi en þau voru að ljúka mánaðarferð um Evrópu á húsbílnum sínum.

Eftir stutt stopp í Danmörku fóru þau Ingó og Íris ásamt mömmu og pabba með Norrænu til Íslands. Ferðin gekk vel og voru þau komin heim um miðjan október.

Í lok september fór ég með Stínu og Sollu til Boston í 4 nátta ferð. Við lögðum af stað á fimmtudegi og komum aftur á þriðjudagsmorgni. Ferðin var skemmti- og verslunarferð þar sem við gistum á hóteli rétt hjá outletinu fyrir utan Boston. Við vorum með bíl allan tímann og rúntuðum um nágrannabæi Boston, kíktum í helstu búðir og veitingastaði og skemmtum okkur konunglega.

Hér eru myndir úr Bostonferðinni.

Um miðjan nóvember fórum við Sigursteinn til Danmerkur að sækja Gloríu, hundinn okkar, sem er búin að vera í pössun hjá Þóru síðan í ágúst. Við flugum til Kaupmannahafnar og tókum þar bílaleigubíl og keyrðum til Frederiksgard, sem er um 340 km leið. Það var mjög gaman að hitta aftur Gloríu og sjá hvað hún hefur stækkað mikið.

Hér er bloggið hennar Gloríu.




Ferðin gekk vel og eftir 4 daga viðdvöl í Danmörku héldum við af stað heim á leið með Gloríu, en hún þurfti að fara í frakt og fór svo beint í einangrun á Suðurnesjum.

Hér eru myndir frá Danmerkurferðinni.


Næst á dagskrá er skíðaferð til Kaprun í Austurríki, en við Snorri förum þangað á fimmtudaginn og verðum í 10 daga.

Þá er tíminn okkar í Austurríki liðinn og við erum komin aftur heim til Íslands, eftir ársdvöl í Ölpunum.
Síðustu vikur fórum við víða áður en við héldum af stað norður Þýskaland og til Danmerkur. Síðustu helgina í Kaprun komu Siggi bróðir, Erla og Lukka í heimsókn til okkar og við fórum m.a. með þeim í dýra-og skemmtigarðinn Ferleiten.



Hér eru myndir frá ferðinni

Þá helgi var mikil hátíð í bænum, Burgfest Kaprun. Fjöldi manns var út um allan bæ í miðaldarbúningum, skrúðganga, sölutjöld og mikið um að vera. Veðrið var ekki uppá það besta, rigning af og til, en fólk lét það ekkert á sig fá og skemmti sér vel. Á laugardagskvöldið fórum við á tónleika í kastalanum þar írsk tónlist var spiluð fram eftir kvöldi.
Hér eru myndir frá hátíðinni



Í lok júlí pökkuðum við svo saman dótinu okkar og héldum af stað norður Þýskaland þar sem við vorum búin að mæla okkur mót við Þóru systir og Sigga bróður og fjölskyldum þeirra. Við gistum á flottu tjaldstæði við norðurströnd Þýskalands og áttum góða helgi þar.
Hér eru myndir frá ferðinni

Við enduðum svo hjá Þóru og fjölskyldu í Danmörku og dvöldum hjá þeim í nokkra daga áður en við héldum heimleiðis. Ingó fór á Subarunum með Norrænu og ég fór með flugi með krakkana frá Billund. Gloría, hvolpurinn okkar, þurfti að vera eftir í Danmörku vegna þess að hún má ekki koma til Íslands fyrr en hún er orðin 7 mánaða. Þá fer hún í einangrun í mánuð áður en hún kemur til okkar.

Hér eru myndir frá Danmörku

Húsbíllinn er ennþá í Danmörku með öllu dótinu okkar og ég vonast til að fá hann heim um miðjan september. Það verður því lítið um ferðalög næstu vikur enda sumir búnir að fá nóg af ferðalögum í bili. Eða eins og Sigursteinn orðaði svo skemmtilega: "Mamma, getum við ekki farið í aaaaðeins styttra ferðalag næst... kannski bara svona eina helgi.... ekki í heilt ár".


Það er dálítið skrítið að vera komin aftur heim til Íslands. Hið daglega líf hafið aftur. Ég er byrjuð að vinna í Sjálandsskóla og krakkarnir byrja í skólanum í næstu viku. Ég er strax farin að sakna Kaprun og Alpanna og bíð þess að komast aftur þangað út. Vonanandi verður það sem fyrst en þangað til mun ég ylja mér á minningum frá þessu skemmtilega og eftirminnilega ferðalagi sem stóð í heilt ár... sem var ótrúlega fljótt að líða.


Þangað til næst.... auf wiedersehn...

Þá fer að líða að síðustu dögum okkar hérna í Ölpunum... í bili allavega   eftir ársdvöl í Austurríki. Þessa síðustu daga höfum við verið mikið á flakki, skoðað ýmislegt sem við ætluðum að alltaf að skoða áður en við færum heim. Í dag fórum við t.d. í skoðunarferð um kastala í nágrenni Salzburgar, sem heitir Hohewerfen.


Í gærkvöldi fórum við Íris á skemmtilega sýningu í Burg Kaprun, sem er kastalinn hérna í bænum okkar. Þetta var sýning frá miðöldum, sem var krydduð með skemmtiatriði trúðs, dönsum og tónlist.
Hér eru myndir frá sýningunni

Á mánudaginn fórum við á Salzburger Freilichtmuseum, sem er eins konar "Árbæjarsafn" Salzborgar. Þar eru um 60 gömul hús frá ýmsum héruðum í Salzburg. Við löbbuðum um svæðið og skoðuðum mörg gömul og skemmtileg hús í blíðskaparveðri. Við fórum líka með lest sem fer um sýningarsvæðið.

Um helgina fórum við m.a. með kláf upp á Azits við Leogang þar sem skemmtilegt leik- og fræðslugarður fyrir krakka. Þar var hægt að gera ýmsar tilraunir og voru tilraunir með vatn það skemmtilegasta hjá mínum börnum.  Hér eru myndir frá ferðinni.



Við erum líka búin að fara nokkrar ferðir með kláfunum í kring og fórum t.d. á Kitzsteinhorn um daginn. Það er gaman að sjá hve mikill munum er á svæðinu á veturna og sumrin. Þarna höfum við farið ófáar skíðaferðir í vetur, enda bara 5 mín. akstur þangað. Núna eru hvítu skíðabrekkurnar orðnar grænar upp í 2000m hæð en þar fyrir ofan er bara urð og grjót og svo jökullinn í 3000m hæð. Miklar framkvæmdir eru í Gipfelstation sem er í rúmlega 3000m hæð, en þar er verið að breyta og bæta veitingasalinn og útsýnispallinn. Það verður gaman að koma aftur næsta vetur og sjá breytingarnar. Hérna eru nokkrar myndir sem ég tók á Kitzsteinhorn   

Ég er búin að setja inn fleiri myndir á heimasíðuna


Við Ingó með Alex og Elfi á götugrillinu um daginn



Síðustu daga og vikur hefur verið mjög gott veður, nánast sól alla daga og hitastigið yfirleitt yfir 30 gráðum. Það fer að líða að því að maður óski eftir aðeins kaldara veðri... en um helgina á að kólna og rigna eitthvað. Það verður þá hægt að nota tímann þá og pakka niður, en við leggjum af stað til Danmerkur í næstu viku.

Siggi og Erla eru á ferðalagi um Alpana og ætla að koma við hjá okkur um helgina og vera samferða okkur til Danmerkur. En um helgina er heljarinnar hátíð í kastalanum hérna í Kaprun og mikið húllum hæ í kringum það.

Það er alltaf eitthvað um að vera hérna í bænum eða nágrannabæjunum, í vikunni fórum við t.d. á hátíð í Zell am See. Núna er bærinn fullur af ferðamönnum og mikið líf á götunum. Stór hluti ferðamannanna eru Arabar, eða slæðukonur, eins og krakkarnir kalla þau. Margar þeirra eru í burrkum, hylja alveg andlit sitt og allan líkamann. Við skiljum stundum ekki í því hvernig þessar konur geta verið svona vel klæddar í þessum hita... í kolsvörtu frá toppi til táar.. og hvergi sést í bert hold... og svo eru þær með sólgleraugu og með sólhlíf... alveg óskiljanlegt...   Og það er hálffyndið þegar kallinn er að taka myndir af eiginkonunni... og það sést ekkert í hana... gæti alveg verið hvaða kona sem er ... hahaha....
Fyrir 5-6 árum þá sáust ekki Arabar hérna í Kaprun en núna er bærinn fullur af þeim... og heimamenn eru ekkert sérlega hrifnir... ég heyrði sögu af einni arabískri fjölskyldu sem var að elda inná hótelherbergi og kveikti opinn eld á gólfinu...   

En stór hluti bæjarbúa hérna lifir á ferðamönnum og þeir taka vel á móti öllum ferðamönnum... hvaðan sem þeir koma. Hérna er mikil uppbygging og í þesum litla 3000 manna bæ eru rúmlega 100 ferðamannaíbúðir til leigu og fjöldinn allur af hótelherbergjum, þannig að íbúafjöldinn margfaldast á háannatímum.


Sólskinskveðjur úr ferðamannabænum Kaprun

Í síðustu viku fórum við á húsbílnum til Sviss og Frakklands. Þetta var draumaferðin hans Snorra þar sem áfangastaðirnir voru Zermatt í Sviss og Chamonix í Frakkland, tvö af þekktustu fjallaþorpum Alpanna. Staðir sem Snorri vildi helst vera á í margar vikur

Við lögðum af stað á laugardegi, keyrðum í Ziller-dal sem er í Austurríki og fórum þar m.a. á sleða (Rodelbahn) í Zell am Ziller. Síðan keyrðum við inn Tux-dalinn og í Hintertux sem er innsti bær í dalnum. Þar er skíðasvæði allt árið upp á jöklinum og bærinn er mikill ferðamannabær. Við keyrðum þaðan í skíðabæinn Mayerhofen og gistum þar á fínu tjaldstæði með sundlaug, sem kom sér vel í hitanum. En síðustu vikur hefur verið mjög heitt hérna í Ölpunum og hitastigið oftast yfir 30 gráðum.

Myndir frá Zillertal



Á sunnudag héldum við til Sviss, keyrðum mjög skemmtilega leið efir fjallvegi sem lá í rúmlega 2.000 m hæð og heitir Oberalppass, en við höfum áður farið þessa leið sem er mjög seinfarin, margar beygjur og þröngur vegur. Leiðin lá þaðan til Zermatt við Matterhorn sem er frægasta og tignarlegasta fjall í Sviss. Í Zermatt eru engir bílar leyfðir og því þarf að gista í næsta bæ sem heitir Füsch. Þangað vorum við komin á tjaldstæðið um kvöldmatarleytið eftir langa keyrslu allan daginn. Þetta er ágætis tjaldstæði sem við höfum áður verið á og það er staðsett alveg við járnbrautarstöðina þar sem hægt er að taka lest til Zermatt.

Um kvöldið hjólaði Snorri til Zermatt, ætlaði aðeins að fá sér smá hjólatúr fyrir svefninn. En leiðin var aðeins lengri en hann hélt og hann klikkaði á að taka með sér ljós, og skyndilega varð kolamyrkur á göngustígnum. Eftir að hafa mjakast áfram í gegnum niðdimman skóginn komst hann þó að lokum á tjaldstæðið fyrir miðnætti. Það bjargaði móðurinni að hann var með síma og gat því látið vita af sér


Á mánudeginum tókum við lestina til Zermatt og eyddum deginum þar. Snorri fór í heljar göngutúr en við röltum bara um bæinn með Gloríu en hún er svo lítil ennþá og getur ekki gengið mikið. En hún vakti gríðarlega athygli í bænum og það gekk hægt að komast með hana áfram. Allir vildu klappa henni og taka mynd af henni. Sigursteinn var orðinn nokkuð þjálfaður í að láta hana "brosa" og koma henni í réttar stellingar fyrir myndatökur. Honum leiddist nú ekki öll athyglin sem hann fékk með hvolpinn. En Gloría greyið var orðin ansi þreytt þegar leið á daginn, hitinn var mikill og hún leitaði alltaf undir borð eða eitthvað annað til að komast í skuggann. Hún var líka orðin frekar leið á allri þessari athygli og var alveg búin að fá nóg af túristum með myndavélar sem vildu klappa henni og knúsa.

Við tókum því lestina aftur til Füsch seinnipartinn en Snorri kom svo um kvöldið eftir að hafa labbað allan daginn um fjöll og firnindi. Hann var alsæl með daginn og tókst að labba úr bænum upp á Gornegrat sem er í 3100 m hæð.

Myndir frá Zermatt

Á þriðjudag ákváðum við að halda til Chamonix í Frakklandi en þangað eru bara tæpir 200 km og við vorum því komin þangað upp úr hádegi. Bærinn Chamonix er þekktastur fyrir að vera við rætur Mt Blanc sem var hæsta fjall í Evrópu áður en Rússland varð Evrópuland. Fjallið er 4.810 m hátt og þangað fara þúsundir ferðamanna á hverju ári. Bærinn iðar af ferðamönnum og fjallabúðum. Þarna er Mekka fjallamannsins, hvort sem menn leggja á Mt. Blanc eða önnur fjöll í nágrenninu, en alls staðar eru göngu- og hjólastígar. Og fyrir þá sem ekki geta eða nenna labbað mikið er hægt að komast ansi hátt með kláfum og fjallalest.

Þar sem við vorum með hvolpinn okkar þá gátum við ekki labbað langar vegalengdir og ákváðum því að taka fjallalestina upp að skriðjökli sem heitir Mer de Glacier en það var draumur Snorra að komast að jöklinum og labba á ísnum. Lestarstöðin er í 1913m hæð og hefur lestin gengið þangað upp í rúmlega 100 ár. Þar eru veitinastaðir, hótel og ferðamannaverslun, enda fullt af túristum þarna.
Við Snorri löbbuðum niður að skriðjöklinum en til þess að komast alla leið þurfti að klifra þverhnípt bergið þar sem búið var að koma fyrir járnstigum og köðlum til að klifra eftir .  Ég var mjög fegin að vera ekki lofthrædd þarna  
Við löbbuðum svo aðeins á jöklinum og Snorri labbaði síðan alla leið niður í bæinn og var kominn á undan okkur á tjaldstæðið, en við tókum lestina niður.

Myndir frá Chamonix koma fljótlega á vefinn minn.

Frá Chamonix heim til Kaprun eru rúmlega 800 km og við ákváðum að keyra það í einum rykk í stað þess að gista á leiðinni. Við vorum því komin heim seint á fimmtudagskvöld eftir langa keyrslu í steikjandi hita... og engin loftkæling í húsbílnum

Um helgina var svo nóg að gera hjá okkur í Kaprun. Á laugardag fórum við í tvö grillpartý, fyrst með Naturfreunde sem er ferðaklúbbur sem við erum í. Um kvöldið var svo götugrill í götunni okkar og þar var etið og drukkið fram eftir kvöldi... svaka fjör

Á sunnudeginum fórum við á fjölskylduskemmtun sem var haldin við stórmarkað í næsta þorpi. Þar var húllum hæ fyrir krakkana, hoppukastali og fleira fjör. En það var svo mikill hiti og við drifum okkur fljótlega heim í garðinn til að komast í skugga og kæla okkur í sundlauginni.

Þessa daga sem eftir eru hér í Kaprun ætlum við að nota vel til að ferðast og skoða næstu bæi og fjöll. Við fórum á mánudaginn upp á Kitzsteinhorn en það er gaman að sjá hvernig skíðasvæðið lítur út á sumrin. Við fórum svo í sund í Kaprun á þriðjudag og á hjólabát á Zell am See í dag. Alltaf nóg um að vera hérna

Hitastigið hefur verið svo hátt undanfarnar vikur að það verður annað hvort að fara til fjalla eða vera við sundlaug   Það er eiginlega of heitt til að ganga og innandyra sitjum við við viftuna, en það er ekki loftkæling í húsinu. En maður þorir nú ekki að kvarta undan hitastiginu... þetta er jú það sem við erum búin að bíða eftir þegar það rigndi sem mest í vor


Næstu daga mun ég setja inn fleiri myndir á heimasíðuna mína frá ferðinni o.fl.


Bestu kveðjur úr hitastækjunni í Kaprun


ps.  minni á gestabókin ;-)   ...alltaf gaman að sjá hverjir eru að fylgjast með

Þá erum við búin að fá nýja Berner-sennen hvolpinn okkar sem heitir Gloría. Hún er búin að vera hjá okkur í hálfan mánuð og það gengur rosalega vel með hana. Hún er alveg eins og hugur manns, gerir þarfir sínar utandyra, eltir okkur á röndum, geltir ekki og "brosir" alltaf til okkar
Hún gjörsamlega bræðir mann og alla sem sjá hana. Hún vekur mikla athygli alls staðar þar sem hún fer og allir vilja klappa henni og knúsa.
Sem dæmi má nefna þegar við Snorri vorum að koma frá því að sækja hana til Þýskalands þá vorum við stoppuð af löggunni í Austurríki, sem er ansi dugleg við að stöðva ökumenn. Nema hvað... þegar búið var að skoða ökuskírteini og tryggingapappíra bílsins þá hópuðust löggurnar hálf inní bílinn til okkar til að dást að, klappa og knúsa Gloríu. Það var hálf fyndið að sjá þessar vígalegu löggur alveg bráðna fyrir litlum hundi...

Gloría er búin að fara í tvær fjallgöngur með okkur, þar sem við fórum upp með kláf og löbbuðum aðeins um svæðið, en Gloría getur nú ekki labbað langt svona ung, og stundum leggst hún bara niður og við þurfum þá að halda á henni



Hér eru myndir frá fyrstu fjallgöngum Gloríu

Ég er búin að stofna blogg um Gloríu þar sem ég reyni að setja inn reglulega fréttir og myndir
Slóðin er: http://berner-sennenhund.blog.is

Á morgun fer svo Gloría með okkur í ferðalag til Sviss og Frakklands þar sem við ætlum að vera í viku.